“Ki te moemoeā ahau ko ahau anake, ki te moemoeā tātou ka taea e tātou.” Arā kā kupu a
Te Puea Hērangi e kawe ana i ngā tūmanako o ō tātou tamatoa i tēnei tau.
Inā te tini ngerongero o ngā whakataukī e kōrero ana mō te hiranga o te kotahitanga kia ea
ai ngā wawata. Ko te haerenga o te tīma rīki nō Tāmaki Makaurau i tēnei tau te tauira nui.
Mai i te orokohanga mai o te kapa nei i te tau 1995, kua whakahuatia e āna kaitautoko te
kupu, “This is our year.” Nā, kua toru tekau tau tātau e rūkahu ana.
Tae rawa mai ki tēnei tau, kua rerekē te wairua o te kapa, o te karapū. Kei te kitea te
kotahitanga a ngā kaitautoko, a ngā kaitākaro. Kua waimaria ahau i tēnei tau ki te tae atu ki
ngā kēmu i te pā tūwatawata rā o Go Media Stadium.
Ka hoki aku mahara ki te rauna taketake o te NRL. Ka whakaeke mai Ngā Tamatoa i te
whīra me te tū ki te haka. Kāore he kare ā-roto i tua atu i tērā whakahīhī pai i pupū ake i
ahau.
Taku hiamo hoki ki te mātaki i taku kapa e whakaatu ana i taku ahurea Māori ki te ao. Kātahi
te whakatinanatanga o te kotahitanga ko tērā! I tū Māori mai, Pasifika mai, Tauiwi mai i raro
tonu i te marumaru o te ao Māori, ā, ko te mea nui o te pō, i toa Ngā Tamatoa.
I a au e tuhi ana i tēnei, kei te whakatata mai ngā whiringa toa. Ko tāku ki a tātau,
whakapono mai, moemoeā mai. Koia nei tō tātau tau.
Nāu ko te mānuka, nāku ko te mānuka ka taitū te hoariri, ā, hai te Oketopa, ka kūī kūī whiti
whiti ora mai te taonga nui o te NRL ki Aotearoa.
Up the Wahs.
Te Aoraki McCracken, Nukutawhiti
