James Milroy

Whakarongo mai rā
Koutou e hine, e tama mā
Ki ngā reo e hāpai nei
I ngā mahi a Hiwa-i-te-rangi

Ua kōnehu
Tū mai rā Matariki
Hiwa, Hiwa
Hiwa-i-te-rangi

Tīaho iho mai rā
Ngā whetū o te pō
Hai ārahi i ngā mahi
Mō te maruāpō

Rōiho kama
Rōake parahutihuti
E moe, e moe
E moe ō kanohi

Ko te whakamaumahara
Ko te hotu o tōku manawa
E ihi ake nei
Mai te puna e
O te tānga manawa

Patupatu ana
Hotuhotu ana
Wōku mahara
Patupatu pā
Hotuhotu hō
Ēīē

E rere rā ngā reo e
Ki te tihi o whakaaro
Ki te whakanuia
Ngā whakakitenga
I waiho mai rā e rātau mā
Whakarehuhia

Takoto noa iho au
I te takapau
Ka tāia
Ki te moe reka

Whakahoki
Ngā mahara
Ki te moe
Moemoeā

Ka tīmata
Te takaoreore o te arero
Pupuke ake nei
Te matemateāone

Hokinga mahara
Ki a rātau mā
Kua tae
I te ipukarea

Me kaua te moe e toropuku
Kai mate koe i te hurihuri
E kūraku nei
I te mauri
O te oriori

Patupatu ana
Hotuhotu ana
Wōku mahara
Patupatu pā
Hotuhotu hō
Ēīē

E rere rā ngā reo e
Ki te kōmata o Haepuru
Kia whakaohohia
a Haematua
Whakariterite tohu o te moehewa
He manu whititua

Whakarehu mai rā
Ko wōku nei wawata
Me ngā whakaaro
O te rā kua hipa

Whakakauhia
Wheako o te wā
Kūmea mai
Ki taku moemoā

Whakatangihia
Te tētere ki Hīona
Kia tangi ngā tohunga
Ngā minita o Ihowā

Nohopuku
Whakakake, kia kore
Hāmamatia
Ko te Reo Māori
Whakamahia
Tō tātau reo whakahira
E mahuki nei
I te werewere
O te korokoro Tūī

Patupatu ana
Hotuhotu ana
Wōku mahara
Patupatu pā
Hotuhotu hō
Ēīē

E rere rā ngā reo e
Ki te mata o te arero
Kia kōrerohia
Te reo o wō tātau tīpuna
Karangahia, pōhiritia a rātau mā
Nau mai ki taku moehewa

Whakaeke mai rā
Koutou te tapu o nōnamata
Tākirihia
Te hunga raumāewa

Heke iho mai rā
Koutou o te huinga o te kahurangi
Hoki mai, hoki mai
Kia awhiawhi

Whakatūpato mai rā
Mēnā he weriweri
Tukia ngā ara
E te matatuhi

Tohutohu mai
Whai whakaaro kia rarau
Tau, tau
Wairua karore

Hoki wairua mai rā
Kia mihia anōtia tāua
E ohia mai nei
Te mate kanehe
O taku ate

Patupatu ana
Hotuhotu ana
Wōku mahara
Patupatu pā
Hotuhotu hō
Ēīē

E rere rā ngā reo e
Ki runga Puna-ariki
Tonoa kia whakahoki wairua
O te hunga e ngaro ana i te tirohanga kanohi
Whakarehu mai ki te taha o te reo Māori
Kōhiti mai ki taku moemoeā
Katohia mai
Ngā tauwharewharenga o te ngākau
Inā, kua tae mai
Ngā pakeke o Hawaiki

Hoki mahara
Tūmeke ki te tūtaki
Kui, Koro
Pāpara, Whaea

Whakaea ngākau
Me ngā taringa
Kua rangona te reo
O rātau mā

Ko te Reo Māori
Te kaikaranga o te takitini
Tūwhitia te hopo
Mairangatia te reo

Matawaia ngā karu
Kua kitea te tipuna
E hoki mai nei
Ki te tihi
O whakaaro nui

Patupatu ana
Hotuhotu ana
Wōku mahara
Patupatu pā
Hotuhotu hō
Ēīē

E rere rā ngā reo e
Ki tua o hirikapo
Ki te kauwakahia
Ngā akoranga o inanahi
Anei ngā hua o te moemoeā
I te Reo Māori

Whakarongo mai rā
Koutou e hine e tama mā
Ki te waraki
O te kōpara i te ata hāpara

Tukuna tīpuna
Kua ārahina
Mātau
Ki te iti kahurangi

Mahea ngā whakaaro
Patua te koheko
Kua tae mai rā
A Tamanuiterā

E oho tohetaka
Kua whakaorahia
Mā tō tātau
Reo Māori

Ko te tangi o moemoeā
Ko te patu o taku manawa
E ihi ake nei
Mai te puna e
O te aroha
Patupatu ana
Hotuhotu ana
Wōku mahara
Patupatu pā
Hotuhotu hō
Ēīē

E rere rā ngā reo e
Ki ngā maunga whakahī
Kia rangona
Ko te Reo Māori
Kia au te moe o te toropuku
Whakarehurehu

Whiti 1 – Waiata a Hirini (E Rere Rā Ngā Reo E)
Whiti 2 – Ka moe te tangata
Whiti 3 – Ka tīmata te moemoeā
Whiti 4 – Ngā tohu o te moemoeā
Whiti 5 – Kare-ā-roto mō te moemoeā Māori
Whiti 6 – Whakatepe