Whakarongo mai ki te tangi o te Maunga, ki ngā uri whakaheke o Tūhoe Pōtiki, tukutuku nei i te takutaku o te ngākau, ki a Hinepukohurangi hei whakaāio i te paepae tapu a Tāne Mahuta, tū ake rā, e ara rā, kōkiri whakamua ki tua o te mamae, whakaaro noa nei ki ngā tukituki i tūria nei i te rohe pōtae o Tūhoe, ka puta rā te rongo ki tawhiti, mau ana te pōuri me te mamae, Te Urewera tū tonu mai rā!
Ā kāti, ka tika hoki kia mihi atu ki a Tuheitia e noho mai rā i te ahurewa tapu o ōna mātua tīpuna, ki te whare ariki ki te kāhui ariki. “Paimārie!” Ki te hunga kua whakarauwakatia nei, i raro i te maru o Te Whare Wānanga o Waikato, tēnā koutou, tēnā koutou, ā tēnā koutou i runga i ngā whakawhiu o te wā.
Tariana Turia tēnā koe, tēnā koe e mau nei i ngā rūkahu a John Key, koia i whakapae nāu te tautoko ki te pupuri tō tāua kainga a Te Urewera. Kia hoki rā anō ki te orokotīmatanga, ki te huatakitanga mai o te whakapū whenua, ki ngā whakahānumi a te Pākehā i ngā tau 1800 kātahi nā te iwi kōhuru ko te iwi Pākehā, riro katoa ngā whenua o Te Urewera , takahia mai ngā māra kai, me ngā kāinga, pūhia katoa ngā kau me ngā hoiho, mau herehere ngā tāngata o Tūhoe, mate kai, mate i te kōhuru, korekore he hokinga. Ko ēnei kōrero mau tonu i a Tūhoe, e whakaritea ana koe John Key ki te pūru e kaikai nei i ōku whenua, “ Ko te Pūru, e ko te Pūru ko au” kīhai rawa i pātai mai, riro katoa a Te Urewera huri kau ake, ki te tau 2010 kāre tonu koe te pūru e aro, ki te whakahoki mai i ngā whenua, ki te muru i ōu hara. Tute atu, tute mai!
Nā reira “Māori mā” koi noho tātau ka pōhēhē, ko John Key arā te kāwana, hei hoa mōu, ēngari anō mō tātau o Tūhoe! Tirohia ngā hītori Māori mā, te whakapū whenua, me te whakahānumi, kia tū mai he kāwana Māori, e whakapono ana ahau, ka ora tātau ngā iwi.
He hokinga whakamuri, he kōkiri i ngā whakamua.
Nāku nā Jackie Kareti Te Amo Te Kurap